浒墅关（苏州话版）：讲起仔伲浒墅关，名气响得刮剌剌，老百姓津津乐淘葛故事匣实头多，啥葛虎丘山葛白老虎逃到此地盘起来，乾隆皇帝过关读仔个错别字读出一个“浒墅关”。江南要冲地，吴中活码头，几几化化、真真假假葛历史故事，侪实梗传唱勒嗨河东、河西隔岸对唱葛盘答山歌里，传唱勒嗨艄公一推一扳葛运河船歌里。梗转来再讲到文昌阁前船桅如林，浮桥上下侪是店面，关席雪雪白，菱荡碧碧清，十里亭长堤送别，五角兜赛船打蘸……难末就算茶馆店里搭起格木橼（yuán）堂来，说书先生三日三夜也讲不完哉。